O sector lácteo galego está inmerso nun proceso de transformación que avanza cara unhas granxas cada vez máis grandes, profesionalizadas e tecnificadas. Este crecemento, lonxe de ser só unha resposta ao contexto económico ou á evolución do mercado, representa tamén unha oportunidade para construír un modelo de produción máis sostible, eficiente e respectuoso co medio. Neste camiño cara ao futuro, a innovación xoga un papel clave.
As empresas que transforman a tradición leiteira de Galicia:
Galicia conta cunha longa tradición gandeira, pero tamén cunha paisaxe diversa e complexa, que require solucións adaptadas ás súas características produtivas. As novas explotacións, moitas delas con dimensións en aumento, enfróntanse a retos como a xestión eficiente dos recursos, a automatización de procesos, o coidado do solo ou a redución da pegada ambiental. A tecnoloxía e a dixitalización convértense así en aliadas indispensables.
Deste xeito, Lazteo céntrase na aplicación de tecnoloxías smartfarming ao sector lácteo galego. O seu obxectivo é claro: ofrecer ferramentas e coñecemento para que as granxas que medran poidan facelo dun xeito sostible e intelixente. Para conseguilo, Lazteo conta coa colaboración de entidades innovadoras que achegan solucións concretas ao territorio.
Un deses colaboradores é Cartogalicia, empresa con máis de vinte anos de traxectoria no eido da cartografía e pioneira no uso de drons aplicados á agricultura. No marco do proxecto Lazteo, Cartogalicia desenvolveu actuacións en plantacións de millo en distintas zonas de Galicia, aplicando tecnoloxía de voos autónomos con drons para monitorizar os cultivos ao longo de todo o seu ciclo: desde a sementeira ata a colleita. A información recollida permite analizar con precisión o estado dos solos, a saúde das plantas e as necesidades específicas de cada parcela.
Xunto a esta visión tecnolóxica, Portomuiños achega ao proxecto unha perspectiva ecolóxica e de innovación baseada no aproveitamento das algas mariñas. Esta empresa galega, especializada no cultivo e procesado de algas de forma sostible, está a investigar como estes organismos poden mellorar o solo agrícola ou incluso formar parte da alimentación animal. As algas, ricas en minerais e compostos bioactivos, teñen un enorme potencial como bioestimulantes naturais, contribuíndo á saúde dos cultivos e á calidade da produción sen recorrer a produtos químicos convencionais.
A colaboración de Cartogalicia, Portomuiños e outras empresas punteiras en Galicia dentro do proxecto Lazteo, ilustra unha aproximación integral ao futuro das granxas galegas: por unha banda, a tecnoloxía aplicada á xestión precisa e eficiente dos recursos; por outra, a incorporación de solucións baseadas na natureza que permiten avanzar cara a unha gandaría máis verde e resiliente.